الاسترزاق في الجرايد المصريه

لسه الاسترزاق شغال في بعض الجرايد المصريه عن طريق مهاجمه اي رجل اعمال وطبعا شراء سكوتهم الموضوع ده قديم قدم السعد والريان طبعا قضيه هشام طلعت مصطفي جريده البشاير الالكترونيه مرحمتوش بس اخيرا في قضيه يحيي الكومي الاخ مصطفي بكري واخد موقف هجوم عنيف وتعريض بالراجل وحستغبي واقول ان الاخ مصطفي بكري ميقصدش حاجه وحشه لاسمح الله,ومن المواقف العجيبه حبيبي عمرو اديب وهوه في حواره مع الكومي وهات يرفع حواجب وغمز عيون وابتسامات وكر وفر كعادته اللي بحبها ولكنه فاجئني بالصمت والتبجيل الذي يصل الي حد الاستكانه وهو يطلب التحدث اليها مكررا حديثها اليه الذي لم نسمعه بالطبع ,بصراحه ياعمرو عيب عيب عيب خليك محايد انت جواك فاهم الموضوع كويس مفيش حد فيهم برئ ولازم تبقي محايد عشان ده حق المشاهد اللي رفعك السما موش حد تاني

جريده اليوم السابع مخترقه من امن الدوله

فور طلب مجموعات مؤيدي البرادعي عمل توكيلات من الشعب لتفويض البرادعي بتعديل الدستور واليوم السابع كل يوم مصوره واحد عامل توكيل يوم التوكيل لعمرو موسي ويوم لايمن نور قمه الخبث فهم يريدون تشتيت الناس واحد في الشرق وواحد في الغرب بكره نلاقي واحد عامل توكيل لجمال مبارك,جريده اليوم السابع حلوه كاخبار جديده وكتنظيم واعداد ولكنها ليست جريده يمكن الاعتماد ليها في الاخبار السياسيه المصريه لانها جريده مخترقه من امن الدوله وبيوجهها كيفما يشاء

بطرس غالي الوزير ده موش نازلي من زور

حته وزير تنك اوي وكفر الشعب ضرايب اخرها الضريبه العقاريه هوه الشعب لاقي ياكل هيا بتتطبق في امريكا وكل ولايه بتحط نسبه معينه من قيمه المنزل بس عندنا لو واحد بني شقه يدفع عليها ضريبه عقاريه ,سافر واتغرب عشان يبني بيت علي ١٨٠ متر لولاده اربعه ادوار يدفع ضريبه عقاريه ,,,,جنون هبل تخلف عقلي بيفكرني بايام المماليك وقصه النشو ممكن تقروها لجمال الغيطاني النشو هو بكرس غالي اليومين دول ورجعنا بقينا دوله ماليك

يحيي الكومي وخلود العنزي

هوه عاش في دور روميو وهيا نصابه برخصه وفكك من قصه اميره وجاريه ,هو حب يلعب قصه الحب والغرام ويتجوز الدلال والجاه والثروه وهيا قررت تلعب لعبه جواز الدلوعه الي ميتردلهاش طلب .هوه كان متجوزها عرفي وهيا نصبت عليه صح بس هوه معاه محمد حموده محامي صايع اوي كان محامي صاحب العباره اللي غرق فيها الف نفس وجابله براءه ...محامي خلود سمير صبري نصحها تقول انها لو كسبت قضيه التعويض تتبرع لمستشفي سرطان الاطفال .هوه عمر اللي بينصب بيتبرع ... وسبب تسليم الجواز لخلود العنزي سبب سياسي يعني الملك عبد الله لسه مرجع الاتنين دكاتره اللي كانوا محبوسين ظلم في السعوديه في زياره الريس بتاعنا وهوه يحجز خلود متجيش!اتوقع هيا تكسب قضيه رد الشرف وهو يكسب قضيه النصب ....

انا قررت اكتب في هذه المدونه كيفما اتفق خصوصا وانا معنديش كي بورد عربي وكفران علي ماعرف اكتب كلمتين وبما ان عنوان المدونه ايضا موش عايزه يربطني بخط معين ولكنني قررت اعمل متابعه يوميه لااحوال مصر اللي يستفزني منها واللي يبسطني عموما قررت ابدء بحوار استفزني لااحمد فتحي سرور رئيس مجلس الشعب المصري لمده عشرين سنه ده لو واخد تابيده ٢٥ سنه كان زمانه طلع لان سنه السجن ب٩شهور.

**** الراجل بيقول ايه خير اللهم اجعله خير عن البرادعي;

وشخصية الدكتور البرادعى «محترمة»، ولكن أقول له: ليس ضروريا أن تبدأ مشاركتك السياسية من القمة.. «تعال يا برادعى اشتغل معانا فى لجنة العلاقات الخارجية بالحزب الوطنى.. انضم لها أو لأى مؤسسة بالداخل ربما تجد نفسك بقدراتك الخاصة قفزت بسرعة إلى أوائل الصفوف ووصلت لهدفك فى مرحلة أخرى».

*** وبيسالوه عن عمرو موسي لو حب ينزل الانتخابات;

(فليبدأ الخطوات السياسية مع القاعدة)

يعني يلعب الاول مع الاشبال

انظروا الي هذا التعليق الجميل من فتحي سرور عندما ساله الجلاد بخباثه اذا مااراد الجلاد نفسه الترشح في الانتخابات وهو رئيس تحرير المصري اليوم والذي يجري الحوار معه في نفس الوقت;

أمامك أحد طريقين، إما أن تحصل على تأييد ٢٥٠ من أعضاء المجالس التشريعية والنيابية، أو .... ثم لماذا تريد ترشيح نفسك للرئاسة «إنت مين إنت؟.. إنت مين؟»

كانت قمه الكوميديا والراجل بينفعل علي الجلاد والجلاد نقله الحوار بالحرف وساب حريه التعليق مفتوحه لقراء عشان ياخد الرد الي يبسطه بما لذ وطاب من تعليقات القراء

افتح ياسمسم

قررنا انشاء هذه المدونه بمعرفتنا في ساعته وتاريخه ليله راس السنه ٢٠١٠واغلق المحضر علي ذلك